
सुख,शान्ति र समृद्धिको बहार बनी आओस्
आत्मियता र भात्तृत्वले शान्ति विगुल छाओस्
हत्या,हिंसा र अपराध विलाएर जाउन्
समृद्धि र सद्गुण फर्कीफर्की आउन् ।
रोग शोक महामारी नासिएर जाओस्
नेता प्रजा सबैमा सद्बुद्दिले छाओस्
अन्यायलाई न्याय अनि दोषी परुन जेलमा
सोझासाझी नपरुन है दुई नम्बरी खेलमा ।
भ्रष्टाचारी, बलात्कारी किरा परी मरोस्
समाजसेवी, कर्मनिष्ठ सधै अघि बढोस
हावाहुरी, आगलागी, बिपत्तिको नाश
हरकोहिको मुहारमा छाओस् नयाँ आश ।
द्वन्द, कलह, अनेकता हराएर जाउन
बैगुनिले पनि अब गुनै मात्र लाउन
भातृत्वको भाव जागी बनुन सबै एक
शान्ति र समृद्धिको पढ्न पाइयोस लेख ।
स्वाभिमानी शिर झुकाई रुक्न नपरोस्
परदेशीको हेपाईमा झुक्न नपरोस्
नयाँ साल, नयाँ चाल, खुशी लहर देख्न
हतारमा छन यी कलम परिवर्तन लेख्न ।
आफ्नो देशको सीप,श्रम बेच्न नपरे
रिसराग एकअर्कामा कहिल्यै नगरे
खुशी रहोस् सबको मन आशु नझरोस्
आत्मबल र आत्मविश्वास कहिल्यै नमरोस् ।
सफलताको बिजभरी खुशी पलाओस्
तेरो मेरो तछाडमछाड सबै हराओस्
दुश्मनी र आतंकलाई पुर्दै माटोमा
सबैलाई देख्न पाइयोस् असल बाटोमा ।
बसन्तको आगमनले ल्याओस् हजुर बहार
फलोस फुलोस जीवन सबको खुशी रहोस् मुहार
सकारात्मक बन्नु सधै लिई असल भावना
नयाँ बर्षको हजुरलाई लाखौंलाख शुभकामना ।।

सरस्वती गजुरेल
बेलकोटगढी नगरपालिका–१०, नुवाकोट


