
काठमाडौँ, १४ जेठ । शान्ति र लोकतन्त्रका लागि महिला नेपाल लैनचौरले नुवाकोटको शिवपुरी गाउँपालिकालाई स्वास्थ्य सामाग्री सहयोग गरिएको छ ।
विश्वका विभिन्न मुलुकसहित नेपालमा पनि नयाँ भेरियन्टसहितको दोस्रो चरणको कोरोना सङ्क्रमितको संख्या बढेपछि काठमाडौँको छिमेकी जिल्ला नुवाकोटको शिवपुरीमा स्वास्थ्य सामाग्री सहयोग गरिएको हो ।
संस्थाकी अध्यक्ष शोभा प्रधान श्रेष्ठले खरीद गर्नुभएको उक्त सामाग्री संस्थाका सल्लाहकार राजबाबु पाण्डेले गाउँपालिकाका प्रमुख रामकृष्ण थापालाई वुधबार हस्तान्तरण गर्नुभयो ।
हस्तान्तरण गरिएका स्वास्थ्य सामाग्रीमा १०० थान एन्टीजिन किट, ५०० एमएलको स्यानिटाइजर २० थान, स्प्रे स्यानिटाइजर २४ थान, के एन ९५ माक्स ३०० थान र पञ्जा एकहजार थान रहेका छन् ।
कार्यक्रममा समाजसेवी पाण्डेले आगामी दिनमा पनि शिवपुरीको विकास र विस्तारमा निरन्तर सहयोग गर्ने प्रतिवद्धता व्यक्त गर्नुभयो ।


