
काठमाडौँ, २४ चैत । नेपाली काँग्रेस काठमाडौँ महानगरपालिका वडा नं ४ को घरदैलो कार्यक्रम तीव्र गतिमा अगाडि बढेको छ ।
काँग्रेस काठमाडौँ महानगरपालिका–४ को सम्पर्क कार्यालय स्थापना गरेसँगै घरदैलो कार्यक्रमले तीव्रता पाएको हो ।

सरकारले बैशाख ३० गतेका लागि स्थानीय तहको निर्वाचनको मिति घोषणा गरेर तयारी अगाडि बढाएसँगै काँग्रेस काठमाडौँ महानगरपालिका वडा नं ४ ले पनि आफ्नो चुनावी अभियानलाई तीव्रता दिएको हो ।

काँग्रेस काठमाडौँ महानगरपालिका–४ का ईकाई सभापति तथा लोकप्रिय नेता रामप्रसाद न्यौपानेले पार्टीले अगाडि सारेको ‘घर घर जाऔँ, काँग्रेस जिताऔँ’ अभियानलाई वडाले तीव्रताका साथ अगाडि बढाएको बताउनुभयो ।

“काँग्रेस काठमाडौँ महानगरपालिका–४ आफ्नो अभियान लिएर वडाभित्रका सबै जनताको घरदैलोमा पुग्नेछ,”– सभापति न्यौपानेले भन्नुभयो । उहाँले काँग्रेसलाई जिताउने जिम्मेवारी काँग्रेसका सबै नेता, कार्यकर्ता र क्रियाशिल सदस्यको रहेको भन्दै सबैलाई अभियानमा सामेल हुन आग्रह समेत गर्नुभयो ।

काठमाडौँ महानगरपालिका वडा नं ४ अन्तर्गत वालुवाटार,चप्पल कारखाना,धुम्बाराही,मण्डिखाटार,टुँडालदेवी,चण्डोल,चुनदेवी, विशालनगर लगायतका स्थानहरु पर्दछन् ।


