
काठमाडौं, ३ कार्तिक । संस्कृति, पर्यटन तथा नागरिक उड्डयनमन्त्री जीवनराम श्रेष्ठले मुलुकमा व्यवसायमैत्री वातावरण बनाउन सत्ता गठबन्धन प्रतिवद्ध रहेको बताउनुभएको छ । मारवाडी सेवा समितिले काठमाडौंमा आयोजना गरेको स्वागत कार्यक्रममा मन्त्री श्रेष्ठले निजी क्षेत्रले भोग्नुपरेका समस्यालाई समाधान गर्दै व्यवसायमैत्री वातावरण बनाउन बाम-लोकतान्त्रिक गठबन्धन क्रियाशील रहने बताउनुभयो ।
मंसिर ४ गते हुने आम निर्वाचनमा काठमाडौं क्षेत्र नं ८ बाट बाम-लोकतान्त्रिक गठबन्धनको साझा उम्मेदवार रहनुभएका मन्त्री श्रेष्ठले दीगो अर्थतन्त्र निर्माणका लागि विभिन्न क्षेत्रमा सुधार आवश्यक रहेको बताउनुभयो । समुन्नत मुलुक निर्माणमा निजी क्षेत्रबाट योगदान पुर्याउन व्यवसाय मैत्री वातावरण अपरिहार्य रहेको बताउनुहुँदै उहाँले नीतिगत सुधार, क्षमता विस्तार जस्ता व्यवसायिक सुधारका कामहरु अघि बढाउनुपर्ने बताउनुभयो । उद्योगी व्यवसायीका समस्या समाधान गर्न सरकार गम्भीर रहेको समेत उहाँले बताउनुभयो ।
लोकतन्त्र संस्थागत नभई आर्थिक विकास र विभिन्न पेशा, व्यवसाय र रोजगारीमा संलग्न नागरिकको अधिकार सुरक्षित नहुने भन्दै उहाँले लोकतन्त्र र संविधानको रक्षा लागि गठबन्धन बनाउनुपरेको बताउनुभयो । कार्यक्रममा प्रदेशसभाका उम्मेदवार राजुराज जोशीले नीतिगत र व्यवहारिक पक्षमा लगानी मैत्री वातावरण बनाउन आफुहरु लागिपर्ने बताउनुभयो । कार्यक्रममा समितिका अध्यक्ष कैलाश गोयल लगायत पदाधिकारीहरुले मारवाडी सेवा समितिले गरिरहेका सामाजिक सेवाका कामहरुबारे जानकारी दिनुभएको थियो ।


