
७ जेठ २०८० शर्मिला विश्वकर्मा, काठमाडौँ
दैनिक रूपमा आवश्यक हुने र विभिन्न सीपहरू मध्ये पहिचान नेपालले अपाङ्गता भएका महिलाहरूका लागि ३ दिने स्वास्थ्य खाना र स्वरोजगार प्रवर्द्धनका लागि पाककला सम्बन्धी अर्थात् स्वास्थ्यकर तयारी, स्वादिलो खानाका परिकार बनाउने तालिम काठमाडौँमा प्रदान गरेको छ । सामाजिक विकास मन्त्रालय, बागमती प्रदेशको सहयोगमा सञ्चालन गरिएको सो तालिममा प्यानकेक, चाउमिन मः मः र कफी बनाउने तालिम सञ्चालन गरेको हो ।
उक्त तालिममा सहभागीहरूले आफूलाई सामान्य दाल, भात र तरकारी पकाउन जानेको भए पनि अन्य स्वास्थ्यकर खाना तथा खाजा र विभिन्न प्रकारका परिकारहरू पकाउन नजानेको कारण होटेलकै भर पर्नु परेको बताउनु भएको थियो । उक्त तालिममा दृष्टिविहीन अपाङ्गता भएकी महिला कमला विश्वकर्माले प्रशिक्षकको रूपमा प्रयोगात्मक रूपमा नै खाना र खाजाहरू पकाउने सीप सिकाउनु भयो । तालिम पश्चात् सहभागीहरूले दाल, भात, खाजाका विभिन्न परिकारहरूमा मःम, चाउमिन, प्यानकेक, कफी, चट्पटे, पानी पुरी लगायतका खाजाका परिकारहरू बनाउन सिकेको र आगामी दिनमा यो सीपलाई आफ्नो दैनिक रूपमा उपयोग गर्ने सक्षम भएको बताउनु भयो ।
सोही तालिमका क्रममा आयोजक संस्था पहिचान नेपालकी अध्यक्ष इच्छा के.सी.ले आगामी दिनमा पनि अपाङ्गता भएका महिलाहरूको आर्थिक उन्नतिको लागि आय-आर्जन हुने खालका स्वरोजगार मूलक तालिमहरू सञ्चालन गर्ने बताउँदै सबै सहभागीहरूले यस ३ दिनमा सिकेको सीपको सुयोग गर्नु हुनका लागि आग्रह गर्नु भयो । उक्त ३ दिने तालिममा विभिन्न प्रकारका २० जना अपाङ्गता भएका महिलाहरूको सहभागिता रहेको थियो ।


